شورای تاجیکان استرالیا در یادداشتی نگاشته است که «با گروهی از بزرگان و جوانان تاجیک شهر ملبورن استرالیا» با شهردار دیدار نموده و در مورد «هویت تاجیکی و جایگاه زبان فارسی» به او معلومات داده‌اند.
در این یادداشت آمده که پیش از این، «هویت ما تحت عنوان افغان شناخته می‌شد» اما در نشست با شهردار ملبورن، «اطلاعاتی درباره هویت تاجیکی، جمعیت تاجیکان، و نقش زبان فارسی در افغانستان/خراسان ارائه گردید.»
شورای تاجیکان استرالیا افزوده که از شهردار «دندنانگ» به‌ویژه به دلیل استقبال گرم و قدردانی‌شان صمیمانه سپاسگزاری می‌کنیم.
در این اواخر شهروندان غیرپشتون افغانستان مقیم در کشورهای غربی حرکتی را آغاز کرده‌اند که در آن از کشورهای میزبان و نهادهای فرهنگی و مرتبط با تثبث هویت مهاجران خواسته می‌شود که تمامی شهروندان افغانستان را«افغان» نخوانند و براساس هویت‌های قومی وتباری مخصوص خود شان آنان را بشناسند. این حرکت بخشی از حرکت فرهنگی‌ای است که سال‌ها پیش در دوره جمهوریت تحت عنوان«من افغان نیستم» از سوی نخبگان فرهنگی اقوام غیرپشتون راه‌اندازی شد.
شهروند افغانستان در کشورهای خارجی با نام افغان یاد می‌شوند. اما نخبگان فرهنگی اقوام غیرپشتون می‌گویند که افغان نام دیگر قوم پشتون است و بنابراین نباید این عنوان بر همه شهروندان افغانستان به گونه یکسان اطلاق شود، زیرا به باورآنان چنین کاری منجر به یکسان‌سازی قومی و تحریف و حذف هویت تباری سایر اقوام می‌گردد.
قانون اساسی افغانستان دوره جمهوریت، ۱۴ قوم را در افغانستان به عنوان اقوام برسمیت می‌شناسد که از این میان اقوام تاجیک، هزاره، پشتون و ازبیک از اقوام بزرگ(به لحاظ جمعیت) در این کشور به شمار می‌روند.
پشتون‌ها اصرار دارند که به تمامی شهروندان افغانستان کلمه افغان اطلاق گردد. امری که با مخالفت غیرپشتون‌ها همواره مواجه بوده است.
