برخی از رسانه‌های تاجیکستان به نقل از منابع خود در دولت تاجیکستان، گزارش‌ها در مورد اخراج اجباری مهاجران افغانستان از این کشور را بی‌اساس خوانده‌اند.

خبرگزاری آسیا‌پلس تاجیکستان امروز، پنج‌شنبه، ۱۹ سرطان/تیر، به نقل از سفارت افغانستان در دوشنبه و مصور بهادری، رییس کمیته پناه‌جویان افغانستان در تاجیکستان، گزارش داده است که اخراج پناه‌جویان افغانستان واقعیت ندارد.

مصور بهادری به این رسانه گفته که تا کنون هیچ پناهنده‌ای درباره اخراج اجباری به این کمیته شکایت نکرده است.

در این گزارش، به نقل از سفارت افغانستان در دوشنبه نیز ادعاهای مربوط به اقدامات پولیس تاجیکستان برای اخراج پناهنده‌گان افغانستان رد شده است.

پیش از این، برخی رسانه‌ها گزارش داده بودند که دولت تاجیکستان برای اخراج پناه‌جویان افغانستان مهلت ۱۵ روزه تعیین کرده است.

مقام‌های تاجیکستانی و نهادهای سازمان ملل تا کنون به‌گونه رسمی در این باره چیزی نگفته‌اند.

این در حالی است که اخراج مهاجران افغانستان از ایران و پاکستان به‌شدت جریان دارد و بحران جدیدی در مدیریت این اخراج شکل گرفته است.

خبر اخراج مهاجران افغانستان از تاجیکستان در رسانه‌های اجتماعی افغانستان نیز به شدت مورد انتقاد قرار گرفت.