رسانه‌های تاجیکستان به نقل از کمیته امنیت ملی این کشور گزارش داده‌اند که در نتیجه درگیری پولیس مرزی تاجیکستان با گروهی از قاچاق‌بران مواد مخدر که از خاک افغانستان قصد ورود به خاک تاجیکستان را داشتند، یک قاچاق‌بر کشته شده است.
طبق گزارش‌ها، یک گروه چهار نفری قاچاق‌بر مواد مخدر در تلاش انتقال مواد مخدر از افغانستان به تاجیکستان بوده‌اند که از سوی نیروهای مرزی تاجیکستان در منطقه ختلان شناسایی شده و دستور توقف به آنان داده شده است.
گزارش افزوده که قاچاق‌بران به دستور توقف پولیس اعتنا نکرده و به درگیری با نیروهای مرزی پرداخته‌اند که در نتیجه آن یک قاچاق‌بر کشته شده و سه نفر دیگر به خاک افغانستان فرار کرده‌اند.
طبق اظهارات منابع امنیتی تاجیکستان، در این عملیات علاوه بر کشف حدود ۷۲ کیلوگرم مواد مخدر، یک قبضه کلاشینکف و دیگر مهمات به دست آمده است.
کمیته امنیت ملی تاجیکستان اعلام کرده که تحقیقات در مورد این پرونده همچنان ادامه دارد.
در گزارش آمده است که گروه‌های جرایم سازمان‌یافته فراملی در مناطق مرزی با افغانستان برای قاچاق مواد مخدر فعالیت می‌کنند.
تاجیکستان بارها از افزایش فعالیت‌های تروریستی و قاچاق مواد مخدر از مرز با افغانستان ابراز نگرانی کرده است.
